Ók óvart á tvær stúlkur

Tvær stúlkur á tvítugsaldri urðu fyrir bifreið í Háengi á Selfossi fljótlega eftir miðnætti á laugardag. Atvikið varð með þeim hætti að ökumaður, sem ekki var kunnugur bifreiðinni og einnig er á tvítugsaldri, ætlaði að aka aftur á bak út úr innkeyrslu við hús. Bifreiðin fór þá skyndilega áfram og á stúlkurnar sem stóðu fyrir framan bifreiðina.

Bifreiðin er sjálfskipt og er talið mögulegt að ökumaðurinn hafi óvart sett í áframgír í stað bakkgírs. Stúlkurnar voru fluttar á heilsugæslustöðina á Selfossi til skoðunar en reyndust hafa hlotið minni háttar meiðsli.