Vilja breytt lög um þjóðlendur

Landssamtök landeigenda á Íslandi skora á Alþingi og ríkisstjórn að breyta lögum um þjóðlendur þannig að þar verði sett inn ótímabundið heimildarákvæði um endurupptöku mála komi fram ný sönnunargögn í þjóðlendumálum sem lokið er með dómum. Þetta var samþykkt samhljóða á aðalfundi samtakanna í Reykjavík.

Vísað er til þess að um sextán þúsund skjöl liggi órannsökuð í Árnastofnun og á Landsbókasafni og þar kunni að vera sönnunargögn um eignarhald á landi sem dæmt hafi verið þjóðlenda. „Þarna er gríðarlegt magn af órannsökuðum skjölum sem geta haft réttaráhrif á mál sem eru búin að fara í gegnum þetta ferli,“ segir Örn Bergsson, formaður Landssamtaka landeigenda.

Fram kom í skýrslu stjórnar á aðalfundinum að Óbyggðanefnd hefði eingöngu leitað til Þjóðskjalasafnsins eftir gögnum í þjóðlendumálum, aldrei til Árnastofnunar. Örn segir það ekki boðlegt að hafa það tilviljunum háð hvort fólk héldi helgum rétti sínum, eignarréttinum. Þess vegna krefðust samtökin þess að öll skjöl væru tiltæk og aðgengileg lögmönnum landeigenda.

„Það þarf að endurskoða framkvæmd þjóðlendulaganna í heild sinni. Lögfræðin hefur leitt þetta mál í ógöngur og við munum aldrei viðurkenna að dómur Hæstaréttar sé réttur í þessu máli þar sem Hæstiréttur leggur á okkur að við berum alfarið sönnunarbyrðina fyrir eignarrétti okkar jarða.“ - fb