Skrifstofa þings kaus að kæra fyrir aðför

Ríkissaksóknari segist ekki hafa heimild til að láta mál niður falla þar sem sjö manns hafa særst í átökum. Hann bendir á að kæran gegn ellefu manns, sem réðust inn í Alþingishúsið með þeim afleiðingum að lögreglumenn og fleiri særðust, komi til sín eftir rannsókn lögreglu á kæru skrifstofustjóra Alþingis. Það hafi verið Alþingi sem ákvað að kæra samkvæmt 100. grein hegningarlaga, sem kveður á um eins árs lágmarksfangelsisvist, verði hin ákærðu dæmd sek.

Ekki hefur verið kært samkvæmt þessari grein síðan 1949.

„Það er ekki verið að ákæra mótmælendurna sem slíka heldur fyrir húsbrot og aðför að Alþingi og fleira. Sem betur fer hefur ákæruvaldið ekki svigrúm til geðþóttaákvarðana í slíkum tilfellum,“ segir Valtýr Sigurðsson ríkissaksóknari. Málið hafi komið fullrannsakað til hans og embættið hafi metið það svo að tilefni væri til að gefa út ákæru á hendur níu manns af þeim ellefu sem kærðir voru upphaflega.

Valtýr hefur áður talað um að miklar annir séu hjá embætti sínu. Spurður hvort þetta mál hafi notið forgangs, segir hann: „Málið kom til okkar í nóvember 2009. Samkvæmt vinnureglu áttum við að taka afstöðu til þess innan mánaðar. Það naut ekki meiri forgangs en svo.“

Ríkissaksóknari megi ekki taka tillit til almenningsálits eða til þess að kæra Alþingis tengist öðrum málum, sem ekki hefur verið ákært í, það er efnahagsbrotum sem kunna að hafa leitt til bankahrunsins. Þau mál komi embættinu ekki við, heldur snúi að sérstökum saksóknara, en annars efnahagsbrotadeild.

Ragna Árnadóttir dómsmálaráðherra segir mjög skiljanlegt að reiði brjótist út þegar ákært er vegna þessara brota en ekki efnahagsbrotanna.

„Ríkisstjórnin hefur lagt mikla áherslu á rannsókn efnahagsbrotanna og gert hana að forgangsverkefni. Stórefld fjárframlög til hennar eru til marks um það. En rannsóknirnar taka sinn tíma og mjög brýnt að gera þær þannig úr garði á að þær eyðileggist ekki í dómsalnum,“ segir hún.

Ragna bendir á að málin séu mjög ólík. Annars vegar flókin efnahagsstarfsemi og hins vegar nokkuð einföld mál.

klemens@frettabladid.is