Engin slasaðist í tveimur veltum

Lögreglan á Selfossi þurfti að sinna útkalli vegna tveggja bílveltna sem urðu með klukkustundar bili síðastliðið föstudagskvöld. Fyrra óhappið varð á Biskupstungnavegi við Þrastarlund þar sem jepplingur með fimm manns innanborðs valt.

Hitt tilvikið átti sér stað við Litlu kaffistofuna þar sem stór jeppabifreið valt þrjár til fjórar veltur. Ökumaður var einn í þeirri bifreið. Í hvorugu tilvikanna urðu alvarleg meiðsl á fólki enda allir í bílbeltum.

Að sögn lögreglunnar má rekja óhöppin til mikillar ísingar og kraps sem myndaðist skyndilega á vegunum. Í óhappinu við Litlu kaffistofuna komu lögreglumenn af höfuðborgarsvæðinu til aðstoðar enda á sama tíma voru lögreglumenn uppteknir vegna bílveltunnar við Þrastarlund.

Um klukkan sex sama dag hljóp hross í veg fyrir vörubifreið á Suðurlandsvegi í Flóa. Hrossið drapst. Stuttu áður hafði lögreglu verið tilkynnt um laus hross við veginn og var verið að gera ráðstafanir til að smala hrossunum og koma þeim inn fyrir girðingu.