Ekkert Jailhouse Rock

Dómsmálaráðherra Bretlands hefur verið flengdur opinberlega. Chrispin Blunt gaf í gær út yfirlýsingu um að almannafé yrði notað til þess að fjármagna uppákomur í fangelsum landsins.

Uppákomurnar gætu verið listviðburðir, vinnustofur, grímuböll og fleira. Jack Straw sem þá var innanríkisráðherra setti bann við slíku fyrir tveim árum þegar fréttist að hryðjuverkamaður hefði tekið þátt í uppistandskeppni og lífstíðarfangar hefðu haldið grímuball.

Í gær þegar hann tilkynnti um að banninu yrði aflétt gagnrýndi Blunt einnig að það hefði yfirleitt nokkurntíma verið sett á.

Þetta var semsagt í gær. Í dag var send tilkynning frá Downing stræti tíu þar sem sagði að forsætisráðuneytið hefði fyrirskipað dómsmálaráðuneytinu að gera það alveg ljóst að engin partí yrðu haldin í fangelsum hennar hátignar.