Mældu bifhjól á 222 km hraða við Akureyri

Lögreglan á Akureyri mældi bifhjól á 222 kílómetra hraða á Svalbarðsstrandarvegi austan við Akureyri upp úr klukkan eitt í nótt.

Ökumaðurinn virti lögregluna að vettugi og hélt sínu striki inn í bæinn. Þegar lögreglumenn héldu í humátt á eftir honum birtust skyndilega tvö bifhjól til viðbótar í sömu átt. Ökumenn þeirra höfðu náð að gíra sig sig niður þannig að lögregla hafði ekki tilefni til að skipta sér af þeim.

Sá sem mældist á 222 kílómetra harða er ófundinn, en þetta er einhver mesti hraði sem lögreglan hefur mælt til þessa.