Tólf ákærðir fyrir hnífstungu

Tólf unglingar verða í dag ákærðir fyrir aðild sína að morði á Viktoríu lestarstöðinni í London. Sofyen Belamúadden var stunginn margsinnis þegar tvær unglingaklíkur bárust á banaspjót í lestarstöðinni á föstudaginn var á háannatíma. Lögreglan hefur nú kært 12 unglinga á aldrinum 16 - 17 ára fyrir aðild sína að málinu og dómari tekur kæruna fyrir síðar í dag.

Tveimur fimmtán ára unglingum, fjórum sextán ára og einum sautján ára var sleppt gegn tryggingu en lögregla segist búast við því að fleiri verði ákærðir vegna málsins. Málið hefur vakið athygli í bretlandi því lögreglan byggir málareksturinn á aldagömlu lagaákvæði sem útleggja mætti sem "sameiginlega ábyrgð".

Það gefur lögreglu kost á að sækja til saka mann sem vissi að félagi sinn ætlaði að veita öðrum lífshættulega áverka og gerði ekkert í því að stöðva hann. Fallist dómarinn á kröfur lögreglu verður málið sögulegt því aldrei áður hafa svo margir verið ákærðir fyrir eitt og sama morðið. Lögregla telur að átökin hafi verið fyrirfram ákveðin á milli klíkanna og skipulögð á samskiptavefjum á borð við Facebook.

Með því að ákæra svo marga í þessu máli vonast lögreglan til þess að fæla unglinga frá því að taka þátt í hópslagsmálum á borð við þessi.