VG alfarið á móti einkaher- Suðurnesjamönnum til skelfingar

Litlar líkur eru á því að hugmyndir um einkarekinn flugher á Íslandi verði að veruleika ef þingmenn Vinstri Grænna hafa eitthvað um það að segja. Hollenska fyrirtækið á bakvið hugmyndina talar 200 milljarða fjárfestingu hér á landi, en litlar upplýsingar fást um fyrirtækið.

Þær eru ekki smáar sniðum hugmyndir hollenska fyrirtækisins ECA programs sem kynntar voru í Fréttablaðinu í morgun.

Fyrirtækið ætlar að leigja úr þotur til heræfinga og talar um fjárfestingar upp á 200 milljarða og þrjú hundruð ný störf hér á landi. Einmitt það sem vantar á Reykjanesið þar sem atvinnuleysið er hvað skæðast. Í fréttum RÚV í haust var raunar rætt um fjögurra milljarða króna fjárfestingu og öllu færri störf.

Hvort sem fjárfestingin verður fjórir eða tvö hundruð milljarðar gæti það reynst atvinnulausum suðurnesjamönnum erfitt að heyra álit þingmanna VG. Björgvin Valur Gíslason, Atli Gíslason og Árni Þór Sigurðsson eru allir efins um að hernaðarstarfsemi sem þessi eigi erindi á íslandi.

Árni Þór er beinlínis á móti því að fyrirtækið fá að starfa hér.

En upplýsingar um ECA programs og stjórnendur þess eru af skornum skammti. Samtök hernaðarandstæðinga benda á að heimilisfang fyrirtækisins sé pósthólf í smábæ einum í Hollandi og ekkert símanúmer sé að finna á heimsíðu þess. Tengiliður fyrirtækisins á Íslandi og forstjóri þess segja að fyrirtækið hafi komið að verkefnum í Darfur og Afganistan en fréttastofa hefur ekki fengið það staðfest.