Um 79% alkóhólista reykja

Um 79% alkóhólista sem koma til meðferðar á Vogi reykja tóbak, samkvæmt könnun sem gerð hefur verið á meðal þeirra. Um 14% hafa reykt en eru hættir en einungis 7% hafa aldrei reykt.

„Þetta er grafalvarlegt mál," segir Valgerður Rúnarsdóttir, læknir á Vogi, í viðtali við SÁÁ blaðið. „Alkóhólistar og aðrir fíklar deyja um aldur fram vegna reykinga. Allsgáðir eða ekki. Áratugir af heilsubresti hrjá marga þeirra einnig vegna reykingatengdra sjúkdóma í lungum, hjarta og æðakerfi auk krabbameina ýmissa," segir Valgerður í samtali við blaðið.

Í blaðinu segir að stórkostlegar breytingar hafi orðið á Íslandi síðustu áratugina og sífellt fækki þeim sem reyki. Neyslustýring með lagasetningum um heft aðgengi eins og hærra verð, reyklaus svæði, tóbakskaupaaldur og auglýsingabann hefur haft sín áhrif.