Fulltrúi ríkis í stjórn Arion skilar ekki ársreikningum

Fulltrúi Bankasýslu ríkisins í stjórn Arion banka á og gegnir stjórnarformennsku í eignarhaldsfélagi sem hefur aldrei skilað ársreikningi.

Forstjóri Bankasýslunnar telur ekki tilefni til að endurskoða stjórnarsetu hans.

Kristján Jóhannsson var skipaður í stjórn bankans í mars. Hann er lektor við viðskiptafræðideild Háskóla Íslands, sérfræðingur í fjármálum fyrirtækja og rekstrarhagfræði og fyrrverandi forstöðumaður Viðskiptafræðistofnunar.

Kristján er eigandi og stjórnarformaður eignarhaldsfélagsins Akureyjar ehf., sem á 61 prósent í lyfjafyrirtækinu Icepharma í gegnum félagið Lyng ehf.

Lyng tapaði rúmum 1,2 milljörðum króna árið 2008 og eiginfjárstaða þess var þá neikvæð um 1,1 milljarð. Akurey var stofnuð árið 2007 og hefur aldrei skilað ársreikningi.

Kristján sagðist koma af fjöllum þegar Fréttablaðið hafði samband við hann í gær.

„Ég þarf bara athuga hvort þú ert ekki að segja mér satt og ef þetta er svona að kippa því þá í lag. Það er ekkert sem stendur í vegi fyrir því að skila þessum reikningum ef þeir eru ekki inni," segir hann. Um handvömm hljóti að vera að ræða.

Elín Jónsdóttir, forstjóri Bankasýslunnar, segir stöðuna ekki gefa tilefni til að endurskoða setu Kristjáns í stjórn Arion.

„Ég skal ekki segja hvort það eru eðlilegar skýringar á þessu. Þetta er ekki eitt af því sem spurt er um eða ber á góma þegar stjórnarmenn eru valdir," segir hún.

 Hún segist ekki trúa öðru en að Kristján muni bæta snarlega úr þessum vanskilum.

Fjármálaeftirlitið breytti í febrúar reglum um hæfismat stjórnar­manna í fjármálafyrirtækjum. Sett var á laggirnar ráðgjafanefnd sem á að fara yfir gögn um stjórnarmenn, funda með þeim og leggja fyrir þá spurningalista og skera í kjölfarið úr um hæfi þeirra.

Matið stendur enn yfir fyrir nýja stjórn Arion, samkvæmt upplýsingum frá Fjármálaeftirlitinu, og ekki liggur fyrir hvenær því lýkur.

Vanskil á ársreikningi teljast alvarlegt brot og geta varðað sektum upp að hálfri milljón.