Jepplingur rann undir flutningabíl á ferð

Ökumaður og farþegi jepplings sluppu ótrúlega vel, að mati lögreglu, þegar bíll þeirr rann á hálku inn undir stóran flutningabíl, fyrir framan afturhjól hans, kastaðist síðan aftur frá og valt. Þetta gerðist klukkan rúmlega þrjú í nótt og var jepplingnum ekið í austur, út frá bensínstöð N-1 ofan Ártúnsbrekku í Reykjavík.

Flutningabíllinn var líka á austurleið, þegar jepplingurinn rann undir hann, en ökumanni hans tókst að halda í réttu horfinu. Mennirnir úr jepplingnum voru útskrifaðir af slysadeild eftir aðhlynningu, en jepplingurinn er gjörónýtur og var fjarlægður með kranabíl.