Upplýsingavefur um þjóðaratkvæðagreiðsluna

Upplýsingavefur dómsmála- og mannréttindaráðuneytisins um framkvæmd þjóðaratkvæðagreiðslunnar um Icesave lögin sem fer fram 6. mars næstkomandi hefur verið opnaður. Á vefnum, sem hefur slóðina www.kosning.is, er að finna fróðleik og hagnýtar upplýsingar er lúta að framkvæmd þjóðaratkvæðagreiðslunnar.

Fram kemur í tilkynningu frá ráðuneytinu að upplýsingarnar nýtist almennum kjósendum og þeim sem vinna að kosningunum, til dæmis varðandi kjörskrá, utankjörfundaratkvæðagreiðslu og atkvæðagreiðslu á kjördegi. Fjallað er um lög og reglugerðir, framkvæmd kosninga og fleira.

Senda má fyrirspurnir til ráðuneytisins um hvaðeina sem lýtur að framkvæmd þjóðaratkvæðagreiðslunnar og ábendingar varðandi vefinn á netfangið postur@kosning.is.

Hægt að kjósa á morgun

Atkvæðagreiðsla utan kjörfundar hefst á morgun. Hægt er að kjósa hjá öllum sýslumönnum á landinu, á aðalskrifstofum eða í útibúum þeirra. Atkvæðagreiðsla utan kjörfundar á erlendri grundu hefst sama dag á vegum utanríkisráðuneytisins sem mun kynna fyrirkomulag þar að lútandi.