Sláturbólan landlæg í kindum

„Þessi veirusýking sem kölluð er sláturbóla, smitast af lifandi sauðfé og af sláturdýrum,“ segir Katrín Andrésdóttir, héraðsdýralæknir Suðurlandsumdæmis, sem kveðst hafa fengið staðfestingu á því að óvanalega mikið sé um þessa veirusýkingu í fólki þessa dagana.

Fréttablaðið greindi frá því fyrir helgi að óvenjumargir hefðu leitað á heilsugæsluna á Selfossi vegna sýkingarinnar. Er um að ræða starfsfólk í sláturhúsum sem hefur þá smitast við störf sín.

Katrín undirstrikar að þótt veirusýkingin leggist á fé og geitur þá sé ekki minnsta hætta á að hún smitist eða berist með kjöti.

„Sláturbólan sést oft á fólki í sauðburði á vorin,“ segir Katrín. „Þá er algengt að rúningsmenn fái hana svo og starfsfólk í sláturhúsum. Veiran lýsir sér sem frunsur á lömbum og getur einnig farið í klaufhvarfið á fé og þá valdið tjóni ef sýkingar myndast.

Þessi sjúkdómur hefur verið landlægur í kindum og geitum, en við höfum enga skýringu á þessu að því er virðist aukna smiti í fólki. Sá sem hefur þó einu sinni fengið sláturbólu fær hana ekki aftur, því fólk myndar mótefni gegn veirunni.“- jss