Nýr hraunfoss í Hvannárgili

Nýr 200 metra hraunfoss hefur myndast í Hvannárgili. Sjónarvottur sá þetta eftir hádegið í dag. Sjónarvotturinn er á staðnum núna og hefur fylgst með því sem fram fór á gosstöðvunum í morgun.

Hraunrennslið úr eldstöðinni á Fimmvörðuhálsi fór að renna í vestur og niður í Hvannárgil í morgun. Eftir það hætti hraunið að renna niður Hrunagil þar sem það hafði áður runnið, sagði jarðfræðingur sem staddur er á svæðinu í samtali við fréttastofu. Hraunfossinn tilkomumikli sem rann niður í Hrunagil er því storknaður, í bili að minnsta kosti.

Mikill fjöldi fólks er nú staddur við gosstöðvarnar til þess að virða fyrir sér náttúruundrin.

Meðfylgjandi mynd er tekin af Jóni Hauki Steingrímssyni sem er á vettvangi.