Árni Páll harmar ákvörðun Ástu

Félagsmálaráðherra vonar að nýr forstjóri verði ráðinn til Íbúðalánasjóðs innan fárra vikna. Hann harmar að Ásta H. Bragadóttir starfandi forstjóri skuli hafa dregið umsókn sína til baka. Hann segir að ríkissjóður muni styrkja fjárhagslega stöðu sjóðsins.

Erfiðlega hefur gengið á ná samstöðu í stjórn Íbúðalánasjóðs um ráðningu nýs forstjóra sjóðsins en stjórnin er skipuð tveimur fulltrúum Sjálfstæðisflokks, tveimur frá Framsóknarflokki og einum frá Samfylkingunni. Það kann eftirvill að hafa áhrif á hvað illa gengur að velja nýjan forstjóra.

Stjórn sjóðsins hefur nú skipað þriggja manna valnefnd til að fara yfir hæfni umsækjenda og gerði það að áeggjan Árna Páls Árnasonar félagsmálaráðherra, sem segir málið hins vegar algerlega vera á forræði stjórnarinnar.

„Það kom fram að hálfu stjórnarformanns vilji til þess að ná betri samstöðu heldur en var í stjórninni. Ég setti þá fram þessa hugmynd en það var stjórnarinnar að meta hvort hún vildi fara þá leið eða einhverja aðra," segir Árni Páll.

Félagsmálaráðherra segir mikilvægt að það sé hafið yfir allan vafa að hæfasti einstaklingurinn sé valinn í stöðuna. Valnefnd hafi farið yfir umsóknir um stöðu seðlabankastjóra í fyrra og það sé stefna stjórnvalda að valnefndir verði notaðar í framtíðinni við ráðningu í æðstu stöður hjá ríkinu.

Ásta H. Bragadóttir hefur gengt forstjóraembættinu um nokkurra mánaða skeið og var ein umsækjenda en hefur nú dregið umsókn sína til baka. Árni segir bagalegt að hún hafi gert það og hann hefði viljað sjá hana í hópi umsækjenda til enda.

Fjárhagsstaða sjóðsins hefur farið versnandi og er eignfjárhlutfallið komið niður í 2,1 % en markmiðið er að það sé 5 prósent. Ráðherra segir að draga verði úr áhættu sjóðsins og leggja honum til aukið eigið fé.