Dregur umsókn til baka vegna hugmynda ráðherra

Ásta Bragadóttir starfandi framkvæmdastjóri Íbúðalánasjóðs, hefur ákveðið að draga umsókn sína um starf framkvæmdastjóra Íbúðalánasjóðs til baka í kjölfar hugmynda félagsmálaráðherra að skipa valnefnd til að meta hæfi umsækjanda um stöðu framkvæmdastjóra Íbúðalánasjóðs.

Hugmyndir félagsmálaráðherra voru kynntar á fundi stjórnar Íbúðalánasjóðs í dag og bókaðar í fundargerð. Í bréfi Ástu segir: „Í kjölfar ofangreindrar bókunar hef ég ákveðið að draga umsókn mína um starf framkvæmdastjóra Íbúðalánasjóðs til baka."

„Umsóknarferlið allt hefur tekið langan tíma og enn sér ekki fyrir endann á því," segir Ásta Bragadóttir jafnframt í bréfi til samstarfsmanna sem fréttastofa hefur undir höndum.



Vandræðagangur hefur einkennt ráðningu í stöðu framkvæmdastjóra Íbúðalánasjóðs og hefur ráðningaferlið tekið lengri tíma en ætlað var. Stjórn Íbúðalánasjóðs hefur áður frestað að taka fyrir ráðningu fnýs forstjóra í stað Guðmundar Bjarnasonar sem lét af störfum um síðustu mánaðamót.

Alls bárust tuttugu og sex umsóknir um starfið og hafa fjórir umsækjendur verið boðaðir í viðtal. Meðal þeirra eru Ásta H. Bragadóttir, sem er aðstoðarframkvæmdastjóri og starfandi framkvæmdastjóri Íbúðalánasjóðs, og Yngvi Örn Kristinsson, fyrrverandi forstöðumaður hjá Landsbanka Íslands. Hann hefur verið starfað sem ráðgjafi félagsmálaráðherra.

„Sú leið sem stjórn ÍLS hefur nú ákveðið að fara, að fenginni tillögu ráðherra, mun vonandi leiða til þess að ákvörðun verði tekin fljótlega um ráðningu. Mitt nafn verður þó ekki í þeim potti umsækjenda sem til greina koma, enda lít ég svo á að þar sem stjórnin treysti sér ekki til að taka ákvörðun, byggða á því ráðningarferli og viðtölum sem nú þegar hafa farið fram, sé það fullreynt að af ráðningu minni verði."

Í lok bréfsins segir Ásta:

„Ég vil sérstaklega þakka ykkur öllum einstakan stuðning og hlýhug nú í sumar og ég verð að segja að þrátt fyrir vonbrigði um að hafa ekki „landað" starfinu, þá bý ég að því að starfsfólk ÍLS hafi litið svo á að ég væri hæf til að gegna stöðu framkvæmdastjóra. Fyrir það vil ég þakka enn og aftur."