Formleg ósk ekki send út fyrr en samstaða næst innanlands

Engin formleg ósk verður sent út til Breta og Hollendinga um nýjar Icesave-viðræður fyrr en það næst pólitísk samstaða hér innanlands um forsendur nýrra viðræðna.

Eins og fréttastofa greindi frá í gærkvöldi hefur engin fromleg ósk um viðræður verið send Bretum og Hollendingum um nýjar Icesave-viðræður. Hins vegar hafa átt sér stað óformlegar þreifingar milli ríkjanna eins og forsætisráðherra greindi frá. En ríkisstjórnin lítur svo á að ómögulegt sé að senda formlega ósk um nýjar viðræður áður en kannaður er grundvöllur fyrir slíkum viðræðum hjá viðsemjendum.

Áður en óskað er formlega eftir nýjum viðræðum þarf að nást pólitísk samstaða hér innanlands um forsendur nýrra viðræðna en ríkisstjórninin freistar þess nú að ná lendingu í málinu og samkomulagi við stjórnarandstöðuna, en ríkisstjórnin fundaði með stjórnarandstöðunni í gær um málið í rúma klukkustund, án niðurstöðu.