Kristín gefur kost á sér áfram

Kristín Ingólfsdóttir, rektor Háskóla Íslands, ætlar að gefa kost á sér áfram í starfið en skipunartími rektors rennur út í sumar og hefur starfið verið auglýst laust til umsóknar.

„Þetta er auðvitað ákvörðun sem ég hef velt vel fyrir mér. Mér finnst við vera á góðri siglingu. Við erum að ná mjög góðum árangri í vísindum og kennslu og ég hef mjög mikinn metnað til þess að við náum að fara vel út úr þessu efnahagsástandi - og ég held að við getum það með sameiginlegu átaki," segir Kristín í samtali við Vísi.

Kristín segir að næstu fimm ár verði að hluta til varnarleikur. „Í raun snýst þetta um það að við vitum að það eru minni peningar til reiðu og mikilvægt að við nýtum sem best þá fjármuni sem við höfum. En ég tel að það sé aldrei mikilvægara - og það er ekki bara mín skoðun heldur hefur það sýnt sig annarsstaðar - að það er aldrei mikilvægara að standa vörð um og byggja upp menntamál eins og í kreppu," segir Kristín. Hún segir að Háskólinn þurfi að vinna að því ásamt öðrum að reyna að ná eins miklu út úr minnkandi fjárveitingum til menntakerfisins og mögulegt er. Um leið sé þetta tími sóknarfæra sem þurfi að nýta.

Það er menntamálaráðherra sem skipar í stöðu rektors. Það gerir hann eftir tilnefningu háskólaráðs. Gefi fleiri en einn aðili kost á sér í embætti rektors byggir háskólaráð tilnefningu sína á undangenginni rektorskosningu.