Engu logið - upplýsingar byggðar á gögnum frá Landsbankanum

Þingmaður Samfylkingarinnar og fyrrum viðskiptaráðherrann Björgvin G. Sigurðsson, sagði á Alþingi í dag að yfirvöld hefðu ekki logið að erlendum eftirlitsstofnunum stuttu fyrir efnahagshrun 2008.

Tilefnið er ásakanir Arnolds Schilder, sem starfaði hjá innra eftirliti Seðlabankans í Hollandi. Hann sagði fyrir sérstakri rannsóknarnefnd þar í landi að kollegar hans hefðu logið að þeim um stöðu Landsbankans.

Þessu neitaði Jónas Fr. Jónsson, fyrrum forstjóri Fjármálaeftirlitsins alfarið og vísaði ásökunum á bug.

Björgvin vitnaði einmitt í tilkynningu frá Jónasi sem barst fjölmiðlum í gær. Þar kom fram að upplýsingarnar sem Fjármálaeftirlitið byggði á voru fyrirliggjandi gögn frá Landsbankanum og hálfsársuppgjör 2008 sem var áritað af endurskoðendum bankans.