Kosið í vor þótt sameining vofi yfir

Vonast er eftir tillögum ríkisstjórnarinnar um aðgerðir vegna fjárhagsstöðu Álftaness í þessari viku.

Ákvörðun um formlegar viðræður um sameiningu Álftaness og Garðabæjar verður ekki tekin fyrr en niðurstaða ríkisstjórnarinnar liggur fyrir, að sögn Pálma Mássonar, bæjarstjóra á Álftanesi. Sveitarfélögin hafa átt undirbúningsviðræður. Pálmi segir að sameining við önnur sveitarfélög verði ekki könnuð fyrr en niðurstaða sé fengin í þær viðræður.

Samkvæmt samningi við Eftir­litsnefnd um fjármál sveitarfélaga (EFS) er Álftnesingum skylt að leita eftir sameiningu við önnur sveitarfélög. Undirbúningur fyrir sveitarstjórnarkosningarnar í maí er þó í fullum gangi á Álftanesi. Í gærkvöldi funduðu bæði sjálfstæðismenn og framsóknarmenn þar um framboðsmál.

Pálmi segir ekkert benda til að niðurstaða úr sameiningarviðræðum fáist fyrir sveitarstjórnarkosningarnar í maí. Sameining taki ekki gildi fyrr en íbúar beggja sveitarfélaga hafa samþykkt hana í almennum kosningum. Óraunhæft sé að ljúka sameiningu fyrir kosningarnar í vor. - pg