Sala tónlistar hefur hrunið síðustu ár

Sala á tónlist í Bandaríkjunum dróst saman um meira en helming milli áranna 1999 og 2009 samkvæmt nýjum tölum. Sama þróun hefur átt sér stað hér á landi.

Í umfjöllun CNN Money.com kemur fram að í Bandaríkjunum hafi sala á tónlist farið úr því að vera 14,6 milljarðar dala (1.860 milljarðar króna) árið 1999 í að vera 6,3 milljarðar dala (tæpir 803 milljarðar króna) á síðasta ári.

Hér eru ekki enn til tölur yfir tónlistarsölu í fyrra, en samkvæmt tölum Hagstofu Íslands er þróunin jafnvel enn ískyggilegri sé litið til tímabilsins frá 1998 til 2008.

Árið 1998 seldist hér erlend tónlist fyrir 395 milljónir króna í heildsölu á verðlagi þess árs. Það jafngildir 716 milljónum króna á verðlagi ársins 2008, en þá seldist hins vegar erlend tónlist fyrir 165 milljónir króna. Samdrátturinn nemur 76 prósentum.

Heildarsamdráttur er þó heldur minni, eða 54,1 prósent, þar sem sala á íslenskri tónlist hefur ekki dregist jafnmikið saman.

„Geirinn er að laga sig að kröfum neytenda um hvernig, hvenær og hvar þeir hlusta á tónlist og við höfum átt við nokkra vaxtarverki að stríða í að hafa tekjur af þessum breytingum,“ hefur CNN Money eftir Joshua Friedman, varaforseta RIAA, samtaka tónlistarframleiðenda í Bandaríkjunum.

Gunnar Guðmundsson, framkvæmdastjóri Sambands flytjenda og hljómplötuframleiðenda, segir algjört hrun hafa orðið í sölu á erlendri tónlist síðasta áratug. „Þannig að tölurnar styðja ekki fullyrðingar sem settar hafa verið fram um að niðurhal tónlistar á Netinu styðji við almenna tónlistarsölu,“ segir hann og bendir á að þar til fyrir fáum árum hafi hlutdeild erlendrar tónlistar verið í kringum 60 prósent á móti þeirri íslensku. „Núna er þetta hlutfall komið niður í 35 prósent.“

Gunnar segir vangaveltur um að ástæður hruns í sölu á erlendri tónlist sé að finna bæði í því hversu dýr tónlist sé orðin, en líklegra sé að þarna gæti að mestu áhrifa niðurhals af Netinu. Það endurspeglist líka í því að þótt margir virðist ekki hika við að hlaða niður erlendri tónlist þá kaupi menn frekar geisladiska með íslenskum tónlistarmönnum.

Gunnar segir að sýna þurfi fólki fram á samhengi hlutanna. „Það verður engin tónlist til á Íslandi ef enginn er til í að borga tónlistar­mönnunum.“ olikr@frettabladid.is