Ekkert nýtt í tillögum framsóknarmanna

Steinunn Valdís Óskarsdóttir, varaformaður þingflokks Samfylkingarinnar, segist fagna tillögum Framsóknarflokksins um þjóðarsátt. Aftur á móti sé ekkert nýtt að finna í þeim.

Framsóknarflokkurinn kynnti í gær hugmyndir sínar í tíu liðum um nýja þjóðarsátt og vill flokkurinn meðal annars endurskoða samstarf íslenskra stjórnvalda við Alþjóðagjaldeyrissjóðinn. Sigmundur Davíð Gunnlaugsson, formaður Framsóknarflokksins, og þingflokksformaðurinn Gunnar Bragi Sveinsson kynntu tillögurnar fyrir fulltrúum annarra flokka á Alþingi í dag. Í tilkynningu frá Framsóknarflokknum í kvöld segir að ljóst sé að ágætur flötur sé á frekari viðræðum um tillögurnar.

Þeirri fullyrðingu er Steinunn ósammála. „Það er ekkert nýtt í þessum tillögum. Þar er bara að finna ágætar lýsingar og göfug og góð markmið en engar útfærslur. Það er ekki þörf á sérstökum viðræðum út af þessum tillögum."

Þá segir Steinunn ljóst að framsóknarmenn og formaður flokksins hafi greinilega dregið í land miðað við fyrri yfirlýsingar sínar um samstarfið við AGS. „Nú leggja þeir til að samstarfið verði endurskoðað en hingað til hefur Sigmundur Davíð heimtað að við hentum Alþjóðagjaldeyrissjóðnum úr landi."