Sjálfstæðismenn velja framboðslista í dag

Átján manns eru í framboði í prófkjöri Sjálfstæðisflokksins fyrir borgarstjórnarkosningarnar í vor sem fer fram í dag. Kosning hófst nú klukkan tíu og stendur fram til klukkan sex.

Hanna Birna Kristjánsdóttir borgarstjóri bíður sig ein fram í fyrsta sæti listans, en fimm bjóða sig fram í annað sæti, allt núverandi borgarfulltrúar nema Geir Sveinsson handboltakappi sem er nýr í framboði. Tengdafaðir hans, Vilhjálmur Þ. Vilhjálmsson núverandi forseti borgarstjórnar og fyrrverandi borgarstjóri, er ekki í framboði, en hann hefur setið í borgarstjórn í 28 ár, eða frá árinu 1982.

Auk Geirs bjóða sig fram í annað sætið þau Gísli Marteinn Baldursson, Júlíus Vífill Ingvarsson, Kjartan Magnússon og Þorbjörg Helga Vigfúsdóttir.

Kosið er á sjö stöðum í borginni og lýkur kosningu klukkan sex. Samkvæmt upplýsingum frá skrifstofu Sjálfstæðisflokksins má reikna með fyrstu tölum klukkan hálf sjö.