Fæðubótarefni í fangelsum bönnuð vegna misnotkunar

Notkun fæðubótaefna í fangelsum landsins verður bönnuð frá og með næstu mánaðarmótum. Páll Winkel, forstjóri Fangelsismálastofnunnar, segir að mikil umræða hafi verið um notkun slíkra efna í fangelsum ríkisins og að bent hafi verið á að ýmsir ókostir fylgi slíkri notkun.

„Ástæður bannsins eru meðal annars þær að efnin eru geymd í stórum dunkum þar sem auðvelt er að fela efni sem óheimilt er að hafa í fangelsum og gera leit fangavarða erfiðari,“ útskýrir Páll. „Þá hafa ílát fyrir efnin ítrekað verið notuð til að brugga áfengi. Viss hluti efnanna hefur þau áhrif að niðurstöður þvagaprufa, sem tekin eru af föngum, mælast rangar.

Framleiðendur fíkniefnaprófa hafa staðfest að svo geti verið. Loks metur Landlæknisembættið það svo að slík efni séu ónauðsynleg og geti verið skaðleg.“

Páll bætir við að í undantekningartilvikum hafi sumir fangar í gegnum tíðina orðið uppvísir að því að misnota fæðubótarefni með þeim afleiðingum að þeir hafi safnað óeðlilegum vöðvamassa og afli eftir því. Því hafi verið tekin sú ákvörðun að banna efnin að undanskildum lýsi og vítamínum. Bannið taki gildi 1. október. Þá verði bannað að selja efnin í fangelsunum eða taka við þeim eftir 15. september.

Spurður hvort viðbrögð hafi borist úr fangelsunum við þessari ákvörðun segir Páll að starfsfólk þeirra hafi undantekningarlaust lýst yfir ánægju sinni með hana.

Þá hafi föngum verið tilkynnt bréflega um bannið. „Sumir voru mjög ósáttir við þetta, en aðrir sýndu þessu skilning,“ segir hann. „Ég ber virðingu fyrir öllum sjónarmiðum en þetta verður hins vegar framkvæmt.“

jss@frettabladid.is