Ronaldo saknar Manchester

Portúgalinn Cristiano Ronaldo segist sakna Man. Utd og útilokar ekki að ganga aftur í raðir félagsins síðar á ferlinum.

Ronaldo var seldur til Real Madrid frá Man. Utd síðastliðið sumar á metupphæð, 80 milljónir punda.

„Auðvitað sakna ég þess að spila með Man. Utd. Ég sakna ekki bara félagsins heldur líka vina minna þar. Ég spilaði þarna í sex ár og það er langur tími. Ég horfi á liðið spila í hvert skipti sem ég fæ tækifæri til þess," sagði Portúgalinn.

„Ég hef enn áhuga á að horfa á Man. Utd og maður veit aldrei, kannski spila ég þarna aftur í framtíðinni. Það er alltaf möguleiki. Ég er ekki að segja að ég sé ekki hamingjusamur í Madrid. Ég er mjög hamingjusamur í Madrid en að sjálfsögðu sakna ég United, stjórans og leikmannanna. Ég yfirgaf fjölskyldu sem er þarna."

Ronaldo var líka spurður út í Wayne Rooney sem hefur blómstrað eftir að Portúgalinn yfirgaf félagið. Telur Ronaldo að Rooney sé betri eftir að hann fór?

„Nei. Hann er kannski að skora fleiri mörk en Rooney er og var einn mikilvægasti leikmaður United og deildarinnar. Hann er frábær leikmaður og það hefur ekkert með það að gera að ég yfirgaf félagið. Hann hefur alltaf verið frábær," sagði Ronaldo og bætti við að það gleddi hann mikið að sjá Rooney spila svona vel.