Sameinað átak gegn svartri vinnu hafið

Átaki gegn svartri atvinnustarfsemi og undirboðum á vinnumarkaði var hleypt af stokkunum um miðjan mánuðinn. Undir­búningur stendur yfir en á nýju ári verður nýjum reglum fylgt ákveðið eftir.

„Fyrirtæki fá núna tækifæri til að kynna sér málið og ljúka undirbúningi. Þegar fram í sækir verður gengið eftir því með skipulögðum hætti að þessar skyldur séu uppfylltar. Smátt og smátt herðum við róðurinn og tugir starfsmanna munu koma að eftirliti," segir Halldór Grönvold, aðstoðarframkvæmdastjóri ASÍ. „Útfærsla eftirlits liggur ekki fyrir en erlendis þekkist að gerðar séu rassíur. Það kemur til greina hér."

Alþýðusambandið og Samtök atvinnulífsins standa að samkomulaginu sem ætlað er að tryggja að allir atvinnurekendur og starfsmenn þeirra fari að gildandi lögum, reglugerðum og kjarasamningum. Samkomulagið nær í fyrstu til starfsmanna og fyrirtækja í byggingarstarfsemi og mannvirkjagerð sem og rekstri gististaða og veitingahúsa. Ástæðan er að í þessum greinum er mest um að farið sé á svig við lög og reglur. Til mikils er að vinna; tekjutap hins opinbera vegna skattsvika er metið á bilinu 40 til 60 milljarðar á ári.

Halldór segir málið eiga sér langan aðdraganda. Það hafi svo verið framkvæmdir við Kárahnjúkavirkjun sem hafi komið málinu á dagskrá. „Við fengum fyrirtæki inn í landið sem vísvitandi ætlaði sér ekki að virða þær reglur sem hér gilda á vinnumarkaði. Á eftir fylgdu innlend og erlend fyrirtæki sem ætluðu að leika sama leikinn."

Halldór segir að eftir erfiða fæðingu hafi vinnustaðaskírteini verið lendingin. Allir, atvinnulífið, verkalýðshreyfingin, skatta­yfirvöld og þá ríkið, hafi séð hagsmunum sínum betur varið með samræmdu kerfi.

Skúli Eggert Þórðarson ríkisskattstjóri fagnar samkomulaginu og segir það stórt skref fram á við. „Þetta er til að sporna við því að menn séu með fólk á duldum launum. Þeir sem það gera sækja sér oft bætur á fölskum forsendum. Þetta kerfi getur því tekið á margvíslegum vanda."

Skúli segir ekkert í hendi um að svört atvinnustarfsemi hafi aukist með hruninu. „Það er hins vegar þráfaldur orðrómur um slíkt."svavar@frettabladid.is