Fleiri ættleiða börn með sérþarfir

Færst hefur í vöxt að íslenskar fjölskyldur ættleiði kínversk börn með sérþarfir þar sem biðin eftir heilbrigðum börnum getur tekið helmingi lengri tíma. Tæplega 30 börn með ólíkar sérþarfir hafa komið til landsins frá 2007.

Sjö börn voru ættleidd hingað til lands frá Kína fyrir rúmum mánuði. Þar af voru þrjú þeirra skilgreind með sérþarfir.

„Flest börnin sem koma núna eru af sérþarfalista og það er vegna þess að það er ekki hægt að fá önnur börn. Þetta eru kínversk börn sem þá er eitthvað að. Það er reynt að velja þau þannig að það sé eitthvað sem hægt er að laga eða hefur verið lagað," segir Gestur Pálsson, barnalæknir.

Ingvar Wu Skarphéðinsson sem er tæplega þriggja ára er eitt þeirra barna sem kom til landsins fyrir skömmu. Hann var af svokölluðum sérþarfalista því hann fæddist með hjartagalla.

Hrund Þrándardóttir, móðir Ingvars, segir að hann hafi fæðst með alvarlegan hjartagalla. Ingvar hafi farið í aðgerð fyrir rúmu ári og að honum heilsist vel í dag.

Fjallar var um málið í þættinum Ísland í dag að loknum kvöldfréttum Stöðvar 2.