Hvítabjörn dró kajakræðara út úr tjaldinu

Ungur norskur kajakræðari þykir hafa sýnt bæði snarræði og kjark þegar hann bjargaði félaga sínum úr kjafti hvítabjarnar.

Sebastian Plur Nilssen (22) og Ludvig Fjeld (22) ætluðu að verða fyrstir manna til þess að róa kajökum sínum umhverfis Svalbarða. Það er um 2000 kílómetra vegalengd.

Þeir lögðu af stað sjötta júlí síðastliðinn og áætluðu að leiðangurinn tæki tvo til þrjá mánuði.

Kom þjótandi með riffilinn

Á miðvikudagskvöldið réru þeir í land eins og venjulega og slógu upp tjaldi. Og vöknuðu við það um nóttina að hvítabjörn réðist þar inn.

Hann greip Sebastian í kjaftinn og dró hann á öxlinni út úr tjaldinu. Hann var kominn með hann eina fjörutíu metra eftir ströndinni þegar Ludvig kom þjótandi með riffil þeirra félaga.

Björninn sleppti Sebastian um leið og fyrsta skotið hitti hann, en Ludvig tók enga áhættu og skaut í hann þrem skotum til viðbótar. Þá var björninn augljóslega steindauður.

Sebastian var með mörg bitsár á efri hluta líkamans og eins á höfði og hnakka. Sárin voru þó ekki lífshættuleg.

Hvítabirnir friðaðir

Ludvig hafði samband við yfirvöld í Longyearbyen sem sendi þyrlu eftir þeim. Sebastian gekkst svo undir aðgerð á sjúkrahúsinu í Longyearbyen.

Hvítabirnir eru friðaðir á Svalbarðal. Sýslumaðurinn þar sagði hinsvegar augljóst að dýrið hafi verið drepið í sjálfsvörn og eftirmáli því enginn.