Sérstakur saksóknari: Húsleitir bera árangur

„Heilt yfir þá er ekki mikið sem hefur upp á vantað í húsleitunum," sagði Ólafur Þór Hauksson, sérstakur saksóknari, í morgunútvarpi Rásar 2 þar sem hann var spurður hvort húsleitir árum eftir ætluð brot skiluðu árangri.

Ólafur sagði reynslu embættisins vera sú að þau gögn sem upp á hefur vantað við rannsóknir embættisins, hafi iðullega fundist.

Hann sagði þó of snemmt að tjá sig nokkuð um heimtur á gögnum í húsleitum tengdu meintu markaðsmisnotkunar máli Glitnis sem nú er til rannsóknar.

Þá sagði Ólafur að um 60 til 70 mál væru til rannsóknar hjá embættinu. Þau mál tengdust viðskiptabönkunum þremur og gott betur.

Aðspurður hvort einhver rannsókn beindist að Landsbankanum svaraði Ólafur því til að eitt það fyrsta sem embættið réðist í við stofnun þess hefði verið húsleit hjá Landsbankanum.

„Landsbankinn fær enga sérmeðferð," sagði Ólafur svo.

Embætti sérstaks saksóknara rannsakar nú meint markaðasmisnotkunarmál Glitnis eins og fyrr greinir frá.

Meðal annars verður Lárus Welding, fyrrverandi forstjóri bankans, yfirheyrður á föstudaginn. Ólafur sagðist ekki geta gefið upp hvenær aðrir einstaklingar yrðu yfirheyrðir en líklegt þykir að Jón Ásgeir Jóhannesson verði yfirheyrður í málinu, en sem kunnugt er hefur hann verið sakaður um að hafa beitt stjórnendur bankans þrýstingi til þess að knýja fram lánveitingar.  Þessu hefur slitastjórn Glitnis haldið fram í einkamálum sem stjórnin hefur höfðað gegn Jóni Ásgeiri hér á landi og í New York.