Passíusálmarnir lesnir víða í dag

Passíusálmarnir verða lesnir víða í kirkjum í dag. Lesturinn er ýmist í höndum eins eða fleiri og víða er tónlistarflutningur hluti af dagskrá. Píslargöngur verða gengnar á nokkrum stöðum, m.a. kringum Mývatn, frá Valþjólfsstöðum að Skriðuklaustri, á Eskifirði og í Laufási í Eyjafirði.

Í kynningu frá Hallgrímkirkju um lestur sálmanna segir: Eyvindur Erlendsson mun hafa skapað þá hefð að lesa Passíusálmana á föstudaginn langa í Hallgrímskirkju á níunda áratug liðinnar aldar og síðan hefur hún skotið rótum víða í kirkjum landsins. Passíusálmarnir eru eitt mesta listaverk íslenskra bókmennta og verðskulda að vera fluttir árlega. Viðtökur almennings og árlegur flutningur þeirra í útvarpinu á lönguföstu eru til marks um að sálmarnir eiga enn erindi við samtímann ekki síður en á dögum Hallgríms og hefðin er fagur vitnisburður um þá rækt sem við sýnum þessu stórvirki okkar í bókmenntum.

Hægt er sjá í hvaða kirkjum passíusálmarnir eru lesnir á vefsíðunni kirkjan.is