Fjölskylduhjálpin gagnrýnd harkalega

 Fjölskylduhjálp Íslands var harðlega gagnrýnd í gær fyrir fyrirkomulag hennar við úthlutun matvæla á miðvikudag.

Í úthlutuninni var Íslendingum veittur forgangur umfram útlendinga, eins og Ásgerður Jóna Flosadóttir, framkvæmdastjóri Fjölskylduhjálparinnar, staðfesti í viðtali við blaðið í fyrradag. Ásgerður vefengdi fréttina hins vegar í tilkynningu í gær.

Spurð um þetta segist Ásgerður sár og ósátt við fréttina: „Við töldum okkur vera að gera góða hluti betri. Þetta var eingöngu gert til þess.“

Að öðru leyti vill hún ekki svara spurningum, svo sem um hvernig fyrirkomulag Fjölskylduhjálpin muni viðhafa í framtíðinni.

Ráða mátti af tilkynningu Fjölskylduhjálpar að mistök hefðu verið gerð, sem yrðu ekki endurtekin.

Formaður velferðarráðs, Jórunn Frímannsdóttir, segir að fundað verði með forsvarsmönnum Fjölskylduhjálparinnar á næstu dögum um hvernig verði bætt úr þessum málum fyrir næstu úthlutun Fjölskylduhjálparinnar.

„Við verðum að vera fullviss um að það verði ekki komið svona fram við fólk í næstu úthlutun,“ segir hún.

Félagsmálaráðherra ræddi um úthlutunina á Alþingi í gær og sagði ekki hægt að sætta sig við að gert sé upp á milli fólks eftir uppruna.

Borgarráð og mannréttindaráð ályktuðu einnig um málið í gær og sögðu meðal annars að ekki væri hægt að umbera að mannréttindastefna Reykjavíkurborgar væri brotin. Móta ætti skýrari reglur á vegum borgarinnar í samráði við samtök sem hljóta styrki frá henni.

Vilborg Oddsdóttir, sem hefur umsjón með innanlandsaðstoð hjá Hjálparstarfi kirkjunnar, segir að hjá sér sé ekki spurt um þjóðerni við úthlutanir.

„Það kemur fram í stofnskrá Hjálparstarfsins að við megum ekki mismuna eftir kyni, trú, eða þjóðerni. Þannig að þessi hugsun kemur ekki einu sinni upp hjá okkur,“ segir hún.

Ekki náðist í Ragnhildi G. Guðmundsdóttur, framkvæmdastjóra Mæðrastyrksnefndar, við gerð fréttarinnar.

klemens@frettabladid.is