Úttekt ýfir upp deilu um strandveiðarnar

Jón Bjarnason sjávarútvegsráðherra hefur gott sem tekið af allan vafa um að strandveiðar eru komnar til að vera. Niðurstöður úttektar Háskólaseturs Vestfjarða (HV) á framgangi og áhrifum veiðanna túlkar ráðherra sem svo að reynsla af veiðunum sé góð. Smábátasjómenn hvetja til þess að veiðarnar verði festar í sessi á meðan útgerðir innan LÍÚ finna þeim allt til foráttu.

Í úttekt HV er meðal niðurstaðna að ánægja sé meðal strandveiðimanna með veiðarnar og fyrir­komulag þeirra. „Þó tilfinningar séu blendnari meðal annarra hagsmunaaðila er þó meirihlutinn á því að strandveiðarnar geti verið leið til að styrkja hinar dreifðu byggðir landsins,“ segir í kynningu.

Sjávarútvegsráðherra segir að næsta skref sé að vinna frumvarp til breytinga á lögum um stjórn fiskveiða sem lagt verði fyrir Alþingi á næstunni. „Tekið verður mið af þeim lærdómi sem hér hefur verið safnað saman við gerð frumvarpsins og allar líkur benda til þess að lagt verði til að strandveiðarnar séu komnar til að vera og því verður ekki lagt til nú að heimild til þeirra verði sett til bráðabirgða líkt og var gert á síðasta ári.“

Þess má geta að Jón Bjarnason staðfesti í viðtali við Fréttablaðið á aðalfundi LÍÚ í lok október að strandveiðar væru komnar til að vera, aðeins væri eftir að sníða ýmsa vankanta af fyrirkomulagi veiðanna.

Skýrsluhöfundar telja að markmiðum hafi verið náð með veiðunum. Þar á meðal að gefa fleiri en handhöfum kvóta möguleika á takmörkuðum veiðum í atvinnuskyni, nýliðun og að auðvelda fólki að afla sér reynslu og þekkingar.

Samkvæmt könnun Háskólaseturs Vestfjarða höfðu áttatíu prósent þeirra, sem þær stunduðu, áður gert út bát, fjörutíu prósent útgerðanna réðu yfir kvóta og 24 prósent höfðu áður selt allan sinn kvóta.

„Skýrslan staðfestir að strandveiðarnar eru sóun á verðmætum,“ segir Friðrik J. Arngrímsson, framkvæmdastjóri LÍÚ, á heimasíðu sambandsins.

Hann segir sóun hafa einkennt þessar veiðar hvar sem á er litið. Allt of margir bátar hafi verið að veiðum með tilheyrandi offjárfestingu. Þá standist gæði stórs hluta strandveiðiaflans ekki samanburð við annan afla sem berst að landi. Svör kaupenda staðfesti það. svavar@frettabladid.is