Telur Svandísi brjóta gegn stjórnsýslulögum

Halldór Halldórsson, formaður Sambands íslenskra sveitarfélaga, telur að Svandís Svavarsdóttir umhverfisráðherra hafi brotið gegn stjórnsýslulögum þegar hún hafnaði skipulagi Þjórsárvirkjana. Dæmi eru um að sveitarfélög séu með ákvæði um gjaldtöku fyrir aðalskipulag í sérstökum samþykktum, sem ráðherra hefur staðfest.

Halldór Halldórsson, formaður Sambandsins, kveðst í samtali við fréttastofu Stöðvar 2 telja að umhverfisráðherra hafi ekki í hinum umdeilda úrskurði fært fullnægjandi rök fyrir ákvörðun sinni. Sem kunngt er hafnaði Svandís aðalskiplagi vegna virkjana sökum þess að Landsvirkjun greiddi kostnað við skipulagsvinnuna.

Halldór telur úrskurðinn ekki góða stjórnsýslu og segir hann ganga bæði gegn jafnræðisreglu stjórnsýslulaga og meðalhófsreglu. Hann sé brot á jafnræðisreglu vegna þess að sveitarfélög hafi margoft áður fengið greitt fyrir aðalskipulagsvinnu, án þess að athugasemd væri gerð, og brot gegn meðalhófsreglu vegna þess að sveitarfélögunum hafi ekki verið gefið færi á leiðréttingu eða að koma með athugasemdir.

Samband íslenskra sveitarfélaga hefur nú óskað eftir fundi með umhverfisráðherra um málið en fulltrúar þess hafa þegar rætt það óformlega við Kristján L. Möller, ráðherra sveitarstjórnarmála.

Bæjarstjóri Ölfuss, Ólafur Áki Ragnarsson, hefur sagt nauðsynlegt að látið verði reyna á stjórnsýslu Svandísar Svavarsdóttur í þessu máli fyrir dómsstólum. Ákvörðun hennar setur til dæmis Ölfus í vanda gagnvart sex ára gamalli samþykkt sveitarfélagsins um gjaldskrá fyrir gatnagerðargjöld og þjónustugjöld. Ákvæði hennar mæla beinlínis fyrir um það að aðilar sem sækja um lóð eða byggingarleyfi, sem hafi í för með sér breytingu á aðalskipulagi og/eða deiliskipulagi, skuli greiða þann kostnað sem breytingin hefur í för með sér.

Þessi samþykkt Sveitarfélagsins Ölfuss hefur hlotið staðfestingu ráðherra. Bæjarstjóri Ölfuss telur að fjöldi annarra sveitarfélaga hafi einnig slíkar gjaldtökuheimildir í samþykktum sínum.