„Ríkisendurskoðun fór óvarlega í fyrirsagnirnar“

„Við urðum strax vör við það að nemendur og starfsfólk höfðu samband og óttuðust að hér væri allt á hausnum. Að sjálfsögðu er ekki svo og mér finnst Ríkisendurskoðun hafa farið óvarlega í fyrirsagnirnar sem höfðu ekki alltaf innistæðu," segir Hjálmar Árnason, framkvæmdastjóri Keilis og fyrrverandi þingmaður Framsóknarflokksins um viðbrögð við skýrslu Ríkisendurskoðunar, en honum finnst framsetning skýrslunnar heldur hörð og ekki lýsa starfi skólans rétt.

Ríkisendurskoðandi birti skýrslu fyrr í dag um stöðu Keilis. Þar kom meðal annars fram að Ríkisendurskoðandi óttaðist að það væri ekki rekstrargrundvöllur fyrir Keili, sem bíður upp á fjölbreytt nám í Reykjanesbæ.

„Sjö mánaða uppgjörið sýnir að skólinn sé kominn fyrir vind," segir Hjálmar en hann bendir á að vissulega hafi skólinn tapað fyrstu þrjú árin. Þetta ár hafi skólinn hinsvegar einsett sér að skila hagnaði og allt bendir til þess að svo muni verða. Því hafnar Hjálmar því að ekki sé rekstrargrundvöllur fyrir Keili.

Á árunum 2007-2010 fékk Keilir samtals 685,7 milljónir króna úr ríkissjóði. Í skýrslunni kemur fram að um helmingur fjárins átti að renna til svokallaðrar frumgreinakennslu sem hefur að markmiði að búa nemendur undir háskólanám. Í skýrslunni er gagnrýnt að Keilir hafi nýtt hluta þeirra til annarrar starfsemi en frumgreinakennslu.

Hjálmar segir það ekki þannig að það sé misfarið með fé. Skólinn er ríkisstyrktur að hluta. Að sögn Hjálmars finnst honum Ríkisendurskoðun skilgreina full þröngt hvert féð á að fara. Spurður í hvað það fór segir hann að það hafi meðal annars farið í almenna starfsemi svo sem námsráðgjafa og skrifstofu.

Hann segir árlegan styrk frá ríkinu, sem er 31 milljón á ári, rati ekki í aðrar námsbrautir sem ekki eru styrktar af ríkinu.

Í skýrslunni segir svo orðrétt: „Enn fremur þurfi mennta- og menningarmálaráðuneytið að efla bæði fjárhagslegt og faglegt eftirlit með einkaskólum sem það hefur samið við."

„Það er lögð áhersla á gæðaeftirlit með náminu," segir Hjálmar og bendir á að það sé sífellt verkefni að stuðla að betra og öflugra námi.

Spurður hvort skýrslan sé áfellisdómur yfir skólann segist Hjálmar ekki líta svo á. Hann segir skýrsluna í neikvæðum fyrirsagnastíl en þegar betur er skoðað er þar fátt sem setur almennilega út á skólann. Keilir stendur vel að sögn Hjálmars og mun verða betri.

„Við kvörtum helst undan því að fá ekki nægt fé í skólann frá ríkinu," segir Hjálmar en Keilir nýtur ekki sambærilegs stuðnings og aðrir skóla á framhaldsstigi að hans sögn.