Phil Brown um Myhill: Varði sex sinnum á heimsmælikvarða

Phil Brown, stjóri Hull, hrósaði markverði sínum Boaz Myhill eftir markalaust jafntefli á móti Tottenham í ensku úrvalsdeildinni í dag. Boaz Myhill hélt sínu liði á floti í leiknum með hverri frábærri markvörslunni á fætur annarri.

„Þetta var stórkostleg frammistaða. Hann varði örugglega sex sinnum á heimsmælikvarða. Hann varði ítrekað mörgum sinnum í röð þegar þeir sóttu hvað mest. Allir leikmennirnir mínir voru frábærir í þessum leik en engin lék þó betur en Boaz," sagði Phil Brown, stjóri Hull.

„Þetta var án nokkurs vafa besta frammistaða mín í langan tíma. Ég er mjög ánægður með að hafa getað hjálpað liðsfélögunum og ég mjög sáttur með stigið. Leikurinn sjálfur er eiginlega í móðu og ég man ekkert alltof vel eftir öllum vörslunum," sagði Boaz Myhill sem er 27 ára Bandaríkjamaður sem hefur staðið í marki Hull frá árinu 2003.