Þingmenn VG fara oftast í frí

Þingmenn Vinstri grænna eru duglegastir í því að taka sér leyfi frá þingstörfum samkvæmt samantekt fréttastofu. Frá kosningum hafa þeir alls verið fjarverandi í rúma sex mánuði.

Varaþingmen eru kallaðir til þegar þingmenn taka sér frí frá þingstörfum eða eru fjarverandi vegna veikinda eða opinberra starfa.

Fréttastofa tók saman hversu oft þingmenn hafa kallað inn varamann frá kosningunum í fyrra vor en rétt er að taka fram að þessi samantekt nær ekki til þeirra þingmanna sem hafa verið í fæðingarorlofi eða tekið sér tímabundið leyfi í tengslum við skýrslu rannsóknarnefndar alþingis.

Þingflokkur vinstri grænna er eftstur á blaði með samtals 200 daga. Atli Gíslason hefur þrisvar kallað inn varamann nú síðast á föstudag þegar hann fór í þriggja vikna frí. Frá kosningum hefur Atli því verið í leyfi frá þingstörfum í 71 dag eða í tæpa þrjá mánuði.

Næstur kemur Árni Þór Sigurðsson, flokksbróðir Atla, en hann hefur verið fjarverandi í 49 daga frá kosningum. Rétt er að taka fram að Árni er formaður utanríkismálanefndar Alþingis og hefur því oft þurft að kalla inn varamann vegna þátttöku í alþjóðastörfum.

Sjálfstæðismenn eru næst duglegastir með 49 daga í fjarveru örlítið meira en þingmenn Samfylkingar sem eru með 42 daga. Þar á eftir koma framsóknarmenn með 35 daga og svo Hreyfingin með 14 daga.

Ekki fékkst uppgefið hvort þingmenn voru fjarverandi vegna einkaerinda eða vegna opinberra starfa. Samkvæmt lögum þiggur hins vegar þingmaður sem fjarverandi í einkaerindum ekki laun fyrir þann tíma sem varamaður hans situr á þingi.

Athugasemd frá ritstjórn:

Birgir Ármannsson, þingmaður Sjálfstæðisflokks og Guðmundur Steingrímsson, þingmaður Framsóknarflokks, tóku sér fæðingarorlof á tímabilinu og eiga því ekki heima í þessari samantekt. Sjálfstæðismenn eru því alls með 17 daga og framsóknarmenn þrjá.