Mancini biðst afsökunar á hegðun sinni

Roberto Mancini, knattspyrnustjóri Manchester City, gæti átt yfir höfði sér refsingu eftir hegðun sína í gær. Mancini og lærisveinar töpuðu fyrir Everton og misstu af mikilvægum stigum í baráttunni um Meistaradeildarsæti.

Mancini lenti saman við David Moyes, stjóra Everton, og fengu þeir báðir brottvísun frá dómaranum. Mancini átti upptökin, geystist að Moyes til að taka af honum boltann. Þau viðskipti enduðu með miklu rifrildi þeirra á milli.

Öryggisverðir og fjórði dómarinn, Howard Webb, skárust þá í leikinn. Stjórarnir tveir tókust í hendur eftir þetta þegar þeim var tjáð að þeir þyrftu að deila lyftu upp í áhorfendastúku til að horfa á það sem eftir var af leiknum.

„Ég er búinn að tala við David og ef ég gerði mistök bið ég hann og dómarann afsökunar," sagði Mancini. „Ég vildi bara fá boltann því það var nóg eftir af leiknum. Ég var pirraður. Dómarinn rak mig í burtu en ég held að þessu máli sé lokið."

Moyes hafði áður látið Mancini heyra það fyrir að veifa ímynduðu spjaldi eftir brot frá Steven Pienaar. „Svona gerist stundum í hita leiksins. Þetta gerist ekki aftur," sagði Mancini.