Bátur strandaði við Húsavík

Sextán tonna hraðfiskibátur, Lágey ÞH, strandaði á skeri við Héðinshöfða austur af Húsavík um klukkan tvö í nótt, en hvorugan skipverjann, sem var um borð, sakaði.

Báturinn var að koma úr róðri með fimm tonn af fiski og höfðu tveir skipverjanna farið í land á Kópaskeri en hinir tveir héldu áfram áleiðis til Húsavíkur. Ekki er ljóst hvað fór úrskeiðis, en báturinn er búinn öllum fullkomnustu siglingatækjum.

Ljóst er að hann er mikið skemmdur og kominn er leki að honum, en nú er beðið eftir björgunarskipi frá Siglufirði og dælum frá Akureyri.

Til stendur að reyna að draga bátinn út á flóðinu upp úr klukkan átta. Björgunarsveitarmenn voru kallaðir á vettvang og standa vaktina í landi og fiskibáturinn Háey lónar fyrir utan og er taug á milli bátanna.

Þokkalegt veður er á strandstað en spáð er versnandi veðri þegar líður á morguninn.