Segir sögu um eðli flokkanna

Gunnar Helgi Kristinsson stjórnmálafræðingur segir ýmislegt mega lesa úr ársreikningum flokkanna. Athygli veki hve Samfylkingin fær há framlög frá lögaðilum árið 2008. Það gæti slegið tóninn fyrir það sem koma skal hjá flokkunum. Þar sem hámarksframlög séu nú 300 þúsund muni fjármögnun dreifast meira og flokkarnir sækja það á hverju ári sem áður var bundið við kosningaár.

Þá segir hann athyglisvert hvað Vinstri græn sæki mikið í gegnum fjárframlög einstaklinga.

„Þetta segir sögu um eðli flokkanna. Vinstri græn eru áhugamannahreyfing sem rekur sig mikið til fyrir eigið fé og hefur úr töluvert minna að spila en Samfylkingin. Samfylkingin notar hins vegar báðar leiðir, framlög einstaklinga og lögaðila."

Gunnar segir ljóst að stjórnmálaflokkarnir séu að verulegu leyti ríkisreknir; í kringum 80 prósent af tekjum flokkanna séu framlög ríkis og sveitarfélaga. „Það segir nokkuð um eðli stjórnmálastarfsemi nú á dögum, þeir eru ekki sjálfbærir án stuðnings opinberra aðila."