Vill stjórnarandstöðuna að borðinu

Ef meirihluti ríkisstjórnarinnar á Alþingi er of veikur til að hrinda aðgerðum í framkvæmd verður að fá stjórnarandstöðuna með að samningaborðinu, ásamt stjórninni, atvinnurekendum og ASÍ, segir Gylfi Arnbjörnsson, forseti ASÍ.

Á fundi formanna og varaformanna allra 53 aðildarfélaga ASÍ sem fram fór í gær kom fram að langlundargeð og þolinmæði verkalýðshreyfingarinnar gagnvart stöðunni í atvinnumálunum væri á þrotum, segir Gylfi. Hann gagnrýnir harðlega samstöðuleysi um aðgerðir sem kveðið sé á um í stöðugleikasáttmálanum á Alþingi.

Eins og fram hefur komið hafa Samtök atvinnulífsins (SA) sagt upp stöðugleikasáttmálanum, sem stjórnvöld, ASÍ og SA gerðu með sér. Gylfi segir formenn aðildarfélaga ASÍ hafa verið harðorða í garð SA fyrir uppsögn sáttmálans, sér í lagi þar sem það hafi verið gert með hagsmuni útgerðarmanna að leiðarljósi.

Vandamálin sem lagt var upp með að leysa eru fráleitt úr sögunni, og ekki hægt að leysa þau með því að hlaupast frá þeim, segir Gylfi. Úr því að samskipti stjórnvalda við atvinnurekendur séu í þessum fasa þurfi að leita nýrra leiða, dugi stöðugleikasáttmálinn ekki verði að finna eitthvað nýtt.

Séu SA ekki tilbúin til að standa við stöðugleikasáttmálann eða koma með öðrum hætti að lausn þeirra vandamála sem nú blasi við er ekki annað í stöðunni en að þær launahækkanir sem ASÍ féllst á að frysta komi til framkvæmda, segir Gylfi. - bj