Lítið þokast í kjaradeilu álversstarfsmanna

Lítið hefur þokast í kjaradeilu starfsmanna Norðuráls. Fundað verður með ríkissáttasemjara á morgun en starfsmenn Norðuáls krefjast sömu kjara og starfsmenn Alcan í Straumsvík. Það þýðir allt að 20 prósenta launahækkun.

Samningaviðræður hafa staðið yfir frá því í október í fyrra en fundurinn með ríkissáttasemjara á morgun er sá nítjándi síðan viðræður hófust. „Við viljum fá sömu laun og eru greidd í sambærilegri verksmiðju sem heitir Alcan í Straumsvík. Það eru okkar kröfur," segir Vilhjálmur Birgisson formaður Verkalýðsfélags Akraness.

Þetta þýðir að í sumum tilvikum hækka laun um allt að 20 prósent. Vilhjálmur bendir á að Norðurál hafi skilað 16 milljarða króna hagnaði árið 2008.

Ágúst Hafberg, upplýsingafulltrúi Norðuráls, sagði í samtali við fréttastofu í dag að á síðasta ári hafi fyrirtækið verið rekið með tapi. Þá sé það skoðun yfirstjórnar að ekki sé hægt að bera saman launakjör hjá Norðuráli við launakjör hjá Alcan Straumsvík.

Vilhjálmur segir ótímabært að ræða verkfallsboðun enda sé það ennþá trú manna að hægt verði að ná samkomulagi.