Blaðamaður ársins vill verða fjölmiðlafulltrúi Steingríms

Jóhann Hauksson, blaðamaður á DV sem nýverið var útnefndur Blaðamaður ársins 2009, hefur sótt um starf fjölmiðlafulltrúa Fjármálaráðuneytisins. Þetta kemur fram á Pressunni og segist Jóhann hafa verið að svipast um eftir nýju starfi undanfarið og því sótt um þegar starfið var auglýst.

„Ég hef sterkar taugar til fjölmiðlunar og á þeim vettvangi hef ég starfað nær sleitulaust frá 1986," segir Jóhann í samtali við Pressuna. „Reyndar starfaði ég við almannatengsl í eitt og hálft ár upp úr 1990 en byrjaði svo aftur í blaða- og fréttamennsku. Ég neita því ekki að laun og ýmis önnur ytri skilyrði hafa haft áhrif á ákvörðun mína að leita eftir öðru starfi."

Elías Jón Guðjónsson undanfarið sinnt starfi fjölmiðlafulltrúa fjármálaráðuneytisins en hann hefur nú hafið störf í menntamálaráðuneytinu.