Yfir 200 strandveiðibátar sektaðir

Fiskistofa hefur lagt gjald á 224 strandveiðibáta af þeim hátt í 600, sem stunduðu strandveiðar í fyrrasumar, vegna þess að þeir komu með of mikinn afla að landi. Gjaldið nemur andvirði umframaflans.

Þá er unnið að því að leggja gjald á 50 til 70 báta til viðbótar, en í lang flestum tilvikum er um mjög lítið magn að ræða, segir á heimasíðu Fiskistofu.

Í mörg horn er að líta hjá strandveiðisjómönnum því þeir þurfa að hlíta sex sértækum skilyrðum við veiðarnar. Fiskistofa getur nú fylgst rafrænt með fjórum þeirra, en með hinum tveimur er fylgst með hefðbundnum hætti.