Hvanndalsbræður og Jógvan komust áfram

Hvanndalsbræður og Jógvan Hansen komust í kvöld í úrslitaþáttinn í Söngvakeppni Sjónvarpsins þar sem valið verður framlag Íslands til Söngvakeppni evrópskra sjónvarpsstöðva sem fram fer í Osló í maí.

Í þremur þáttum á laugardögum í janúar verða kynnt til sögunnar fimmtán lög. Fimm lög keppa í hverjum þætti og tvö þeirra fara áfram í úrslitaþáttinn eftir símakosningu.

Fyrsti þátturinn var fyrir viku og komust þá tvö lög áfram. Í kvöld fengu lögin I'll Be One More Day eftir Óskar Pál Sveinsson og Bubba Morthens í flutningi Jógvan Hansen og Gleði og glens eftir Rögnvald Rögnvaldsson í flutningi Hvanndalsbræðra flest atkvæði. Þau komust því í úrslitaþáttinn sem fer fram laugardagskvöldið 6. febrúar.