Sigurvegarinn færður niður í fimmta sæti

Bæjarfulltrúinn Erling Ásgeirsson, sem fékk kosningu í 1. sæti í prófkjöri Sjálfstæðisflokksins í Garðabæ í byrjun febrúar var færður niður í 5. sæti á fundi fulltrúaráðsins í kvöld. Áslaug Hulda Jónsdóttir sem hafnaði í 5. sæti var færð upp í 1. sætið. Tillaga í þessa veru var borin fram af Erling fyrir hönd þeirra sem hlutu bindandi kosningu í fimm efstu sæti listans, að fram kemur í tilkynningu. Í prófkjörinu röðuðust karlmenn í fjögur efstu sætin.

Sjálfstæðisflokkurinn fékk fjóra bæjarfulltrúa kjörna í bæjarstjórnarkosningunum 2006 og A-listi Samfylkingar og Framsóknarflokks þrjá.

„Ekki má gleyma þeirri staðreynd, að þegar rýnt er í niðurstöður prófkjörsins, kemur í ljós afgerandi vilji kjósenda til að hafa konu í einu af efstu sætum listans. Þessi tillaga kemur til móts við þær væntingar en hún hefur jafnframt þann augljósa kost að hún leiðréttir aldursskiptingu frambjóðenda í efstu sætum listans. Með þessari breytingu mun reynd og hæf kona skipa fyrsta sæti listans og þar með verða hluti af forystusveit okkar sjálfstæðismanna í Garðabæ," sagði Erling á fundinum að fram kemur í tilkynningunni.