Bjóða upp á ferðir á úrslitin í Vín

Ferðaskrifstofurnar Úrval-Útsýn, VITA og ÍT-ferðir bjóða allar upp á ferðir á undanúrslit og úrslitaleikinn á Evrópumeistaramótinu í handknattleik sem fer fram í Austurríki.

VITA og ÍT-ferðir bjóða upp á flug á laugardagsmorgun beint til Vínar í leiguflugi með Icelandair. Þar verður gist í eina nótt á þriggja stjörnu hóteli. Flogið verður aftur til Íslands á sunnudagskvöldið. Innifalið í pakkanum eru miðar á alla fjóra leiki helgarinnar - báða leiki undanúrslita, leikinn um þriðja sætið sem og sjálfan úrslitaleikinn.

Pakkaferð ÍT-ferða kostar 124.900 krónur. Innifalið í því er flug, gisting í 2ja manna herbergi, miðar í tvo daga, akstur, fararstjórn og flugvallaskattar.

Úrval Útsýn býður upp á ferð með Iceland Express. Greint verður frá verði og tilhögun ferðarinnar innan skamms.