Miskabætur vegna barnaníðs lækkaðar

Miskabætur, sem Tryggvi Óli Þorfinnsson, 42 ára gamall Hvergerðingur, var dæmdur til þess að greiða fjórtán ára stúlku fyrir misnotkun, voru lækkaðar um 200 þúsund krónur í Hæstarétti Íslands.

Tryggvi var dæmdur í átján mánaða fangelsi í Héraðsdómi Reykjavíkur í maí á síðasta ári fyrir að misnota unglingsstúlku kynferðislega. Hann var meðal annars dæmdur fyrir að setja gervilim í leggöng stúlkunnar þegar hún var fjórtán ára auk þess sem hann lét hana hafa við sig munnmök.

Hæstiréttur komst hinsvegar að þeirri niðurstöðu að það væri ekki sannað að hann hefði sett gervilim inn í leggöng stúlkunnar. Misnotkunin hófst þegar hún var tólf, þrettán ára gömul.

Honum er gert að greiða stúlkunni átta hundruð þúsund krónur í skaðbætur og er vísað til þess að verknaðurinn hafi haft í för með sér alvarlegt tjón fyrir brotaþola sem lýsi sér í djúpstæðri vanlíðan sem hafi haft áhrif á allt hennar líf.

Stúlkan var dóttir æskuvinar Tryggva Óla en hann passaði hana fyrir æskuvininn. Í dómsorði Héraðsdóms Reykjavíkur segir: Um hafi verið að ræða gróft brot gegn persónu- og kynfrelsi brotaþola.

Sé brotið sérstaklega alvarlegt með tilliti til ungs aldurs brotaþola og sé það til þess fallið að hafa áhrif á andlega og þar með líkamlega heilsu brotaþola um ókomna tíð.

Dómurinn er óskilorðsbundin.