Úttekt landlæknis á öryggi vegna mönnunar ekki gölluð

Landlæknisembættið hefur enga ástæðu til að efast um áreiðanleika eða réttmæti gagna úr sjúklingaflokkunarkerfi Landspítalands og stendur við þær upplýsingar sem fram koma í greinargerð til heilbrigðisráðherra um mat á stöðu öryggismála varðandi mönnun á spítalanum.

Félag íslenskra hjúkrunarfræðinga gagnrýnir úttektina harðlega. Hún sé að stórum stórum hluta byggð á upplýsingum úr sjúklingaflokkunarkerfi sem hefur ekki verið uppfært í langan tíma og var aflagt í nóvember. Elsa B. Friðfinnsdóttir, formaður félagsins, segir í Fréttablaðinu í dag að við greiningu Landlæknisembættisins sé notað gagnagrunnur sem hafi ekki verið uppfærður síðan 2004.

Fram kemur í yfirlýsingu á vef Landlæknis að sjúklingaflokkunarkerfið hafi verið notað á Landspítalanum allt frá árinu 1987 í þeim tilgangi að fylgjast með hjúkrunarþörfum sjúklinga og reikna út æskilega mönnun í samræmi við þær. Landlæknisembættið telji gögnin afar mikilvæg fyrir eftirlit með hjúkrunarþjónustu á spítalanum. Hafa verði í huga að kerfið mæli þarfir sjúklinga fyrir hjúkrun en ekki vinnuframlag einstakra starfsstétta.

Störf á sjúkrahúsum í eðli sínu álagsstörf

„Eins og fram kemur í greinargerð Landlæknisembættisins er alkunna að breytingar valda álagi, ekki síst ef starfsfólk telur sig skorta upplýsingar, mikil óvissa ríkir, starfsfólkið er mótfallið breytingunum eða ef breytingarnar snerta starfsöryggi þess. Margt af þessu á við um Landspítalann um þessar mundir, en kemur ekki fram í gögnum úr sjúklingaflokkun af augljósum ástæðum."

Þá er tekið fram að störf á sjúkrahúsum séu í eðli sínu álagsstörf. Kannanir um starfsálag sem gerðar voru árin 2006 og 2009 gefi til kynna að álag í starfi meðal hjúkrunarfræðinga og sjúkraliða sé mikið og streita þó nokkur. Æskilegt væri að endurtaka slíka könnun.

„Fram hefur komið að núverandi sjúklingaflokkunarkerfi hefur verið tekið úr notkun og er áætlað að taka upp annað sjúklingaflokkunarkerfi á næstunni. Landlæknisembættið tekur undir að mikilvægt sé að hafa tiltækt sjúklingaflokkunarkerfi í hjúkrun til að fylgjast með hjúkrunarþörfum og mönnun, enda er slíkt tæki mikilvægt fyrir eftirlit embættisins," segir á vef Landlæknis.