Óskilalampar til Ríkiskaupa

Þeir gróðurhúsalampar sem lögregla hefur lagt hald á þegar kannabisræktanir eru stöðvaðar fara til Ríkiskaupa, eftir að hafa verið gerðir upptækir með dómi. Þar eru þeir seldir eins og aðrir óskilamunir. Andvirðið rennur í ríkissjóð.

Þetta segir Stefán Eiríksson lögreglustjóri á höfuðborgarsvæðinu.

Fjöldinn allur af gróðurhúsalömpum er í geymslu lögreglunnar á höfuðborgarsvæðinu, eins og Fréttablaðið hefur greint frá. Þeir hafa ásamt öðrum viðamiklum búnaði verið gerið upptækir þegar kannabisræktanir hafa verið teknar. Búnaðinn þarf að geyma þar til dómur er genginn í viðkomandi máli.

Stórum hluta þeirra lampa sem teknir hafa verið hjá kannabisræktendum hefur verið stolið úr gróðurhúsum. Nýverið sagði Fréttablaðið frá gróðurhúsaeiganda í Hveragerði sem fimmtíu gróðurhúsalömpum hafði verið stolið frá.

„Ef lamparnir eru auðkenndir með einhverjum hætti er þeim skilað til eigenda,“ segir Stefán. „Séu þeir nothæfir en ómerktir og ekki hægt að finna eigendur þeirra er þeim ráðstafað af Ríkiskaupum, eins og öðrum óskilamunum.“ - jss