Eiginkonurnar eru komnar til Vínar til að styðja sína menn

Sjö eiginkonur leikmanna íslenska handboltaliðsins voru komnar til Vínarborgar í gærkvöldi og von er á fleirum. Þær ætla að fylgjast með mönnum sínum í þeim leikjum sem eftir eru á Evrópumótinu.

„Ég kom í dag en missti reyndar af leiknum því ég var veðurteppt á flugvellinum, sem var frekar glatað," segir Eivor Pála Blöndal, eiginkona Alexanders Peters­sonar.

Hún segir að konurnar hafi haldið sig heima hingað til því flestar eru þær með börn og erfitt að losna í langan tíma. Ömmur og afar gæta nú afkvæmanna.

„Við verðum flestar hér þangað til þetta klárast. Það er engin komin með miða heim enn þá," segir Eivor.

Konurnar gista ekki á sama hóteli og handboltaliðið og Eivor var ekki búin að hitta mann sinn í gærkvöldi.

„Við erum að borða saman stelpurnar og svo hittum við þá í anddyrinu. Þeir fara síðan á fundi og við fáum ekki að fara með í það. Þannig að við erum bara á eigin vegum, enda erum við ekkert að fara að sofa klukkan tíu eins og þeir!" segir Eivor.

Landslið Íslendinga mætir Rússum í dag og hefst leikurinn klukkan 15.

- kóþ